Бас директордың ұжымға үндеуі / Обращение генерального директора к коллективу

Құрметті әріптестер!

Қазіргі таңда инфекцияның күллі әлемге лезде таралуына байланысты адамдардың тұрмысы мен өмір сүру жағдайлары да бір сәтте өзгеруде. Осы қиын-қыстау кезеңде  біздің әрқайсымыз инфекцияның таралмауына барынша бөгет жасап, өзіміз бен тумаластарымыздың, жақындарымыз мен достарымыздың және әріптестеріміздің өмірі мен денсаулығына қауіп-қатер төнбеуіне қолдан келетін бар мүмкіндігімізді пайдаланып, әрекет етуіміз керек. Осы орайда «бір жағадан бас, бір жеңнен қол шығарып» бар күш-жігерімізді бір бағытқа жұмсау үшін дәрігерлер мен мамандардың кеңестерін, мемлекеттік, жергілікті және аймақтық штабтар мен мекеме басшыларының шешімдерін орындауымыз қажет. Сондай-ақ, үкімет пен мекеме басшыларының (сонымен қатар Тапсырыс беруші мекемелердің) барлық қауіпсіздік шараларын қамтамасыз ету мақсатында енгізген қолайсыздықтары мен шектеулерін түсіністікпен қабылдап, өздеріңіз оларды бұлжытпай орындап, сонымен қатар жанұяларыңыз бен ұжымдарыңызда насихаттауыңызды сұраймын.

«ҚазМұнайГаз» ҰҚ» АҚ тарапынан қауіпсіздікті қамтамасыз ету мақсатында қажетті шараның  барлығы қолданылуда. Компанияларды  профилактикалық құралдармен қамтамасыз ету, санитарлық шараларды ұйымдастыру, медициналық бақылауды  күшейту барысында барлық мүмкіншіліктер пайдаланылып жатыр. Сонымен бірге, мұнай бағасының  күрт құлдырауына қарамастан, жұмыс орындарының қысқаруына, жұмыс уақытының азаюына немесе қысқаруына  жол бермеу бағытында  барлық мүмкін болатын шаралар қабылдануда.

«Ойл Транспорт Корпорейшэн» ЖШС өз кезегінде санитарлық-эпидемиологиялық стандарттардың талаптарын, санитарлық дәрігерлердің, Маңғыстау облысы әкімдігінің, «ҚазМұнайГаз» ҰҚ» АҚ, «ММГ» АҚ  жедел штабтарының  шешімдері мен ұсыныстарын басшылыққа ала отырып, барлық қажетті шараларды жүзеге асырады. Қазақстан Республикасында пандемияның таралуына байланысты «ОТК» ЖШС-де жедел штаб құрылып,  инфекцияның алдын-алу шаралары жасақталып, аймағымызда  инфекцияның таралуы жіті бақылауға алынып,  қосымша қауіпсіздік шаралары енгізіліп отыр. Жұмысшылар маскалар және қолғаптармен қамтамасыз етілуде. Кеңсе ғимараттары мен өндірістік жайлар, автобус салондары дезинфекцияланып,  үнемі кварцпен  зарарсыздандырылуда. Дезинфекциялау үшін «Медитерра» ЖШС мамандандырылған зертханасымен келісім жасалды. Қызметкерлердің дене температурасын электронды термометрмен өлшеу арқылы күнделікті медициналық бақылау жүргізу үшін мамандандырылған  «СофиМед» ЖШС-мен келісім шарт жасалды. Әкімшілік қызметкерлерінің көпшілігі қашықтан жұмыс жасау тәртібіне ауыстырылды.

Наурыз айының жұмыс нәтижесі бойынша өндірістік қызметкерлерге ай сайынғы сыйақы төленді. Басқару аппаратының қызметкерлеріне тоқсан сайынғы сыйақы  ҚМГ-да бюджеттің түзетілуі мақұлданғаннан кейін, сәуір айында төленетін болады. Яғни, өткен мерзім ішінде Тапсырыс берушілер тарапынан жұмыс көлемін айтарлықтай төмендету болған жоқ. Қазіргі уақытта Серіктестіктің штаттық құрамы мен аутстаффинг арқылы жұмысқа тартылған  қызметкерлерінің  (Әкімшілк қызметкерлері мен Өндірістік жөндеу цехы) жалақы төлеу бағытындағы  еңбек жағдайлары нашарлаған жоқ. Қызметкерлердің жаппай шоғырлануын болдырмау мақсатында, оларды қашықтан жұмыс жасау тәртібіне ауыстыру, еңбек демалыстарына жіберу шаралары қарастырылды. Құрылымдық бөлімше басшыларына инженерлік-техникалық қызметкерлер мен өндірістік жөндеу цехы жұмысшыларын ауысымдық тәртіпке уақытша ауыстыру мүмкіншіліктерін қарастыру құқы берілді. Бұл шаралар барысында жалақы төмендетілмейді.

Инфекцияның таралуын болдырмау бағытында жасақталған іс-шараларды жүзеге асыру үшін (аймақта инфекция жұқтырғандар анықталғаннан кейін) сәуір айында ҚР-ның вахталық әдіспен жұмыс жасайтын барлық мұнай компаниялары 28-30 күндік режимге ауыстырылды. «ОТК» ЖШС басшылығы жаппай вахталық ауысымдар кезіндегі жұмысшылардың қауіпсіздігін қамтамасыз ету мақсатында автобустардың жолаушылармен толтырылуын азайту (жолаушыларды қашықтықта орналастыру, яғни арасына бір орын тастап  отырғызу) арқылы рейстер санын екі есеге көбейту туралы барлық тапсырыс беруші ұйымдарға және «ҚазМұнайГаз» ҰК» АҚ-на ұсыныс жіберді.

Алайда, инфекцияның таралуы қарқынды дамуда. Жаңаөзен қаласында вирус жұқтыру анықталғаннан кейін, «ӨМГ» АҚ  басшылығы қосымша қауіпсіздік шараларын қабылдауға мәжбүр болды. Аймақта/кен орындарында ауру анықталған жағдайда кейбір цехтар мен нысандардың, мердігерлік ұйымдардың және т.б. тоқтатылуы қарастырылады.

Сондай-ақ, біз жаңа сынақтарға дайын болуымыз керек. Серіктестік басшылығы атынан  Сізден моральдық және психикалық тұрғыдан дайын болуды сұраймын. Сонымен бірге біз өз тарапымыздан қауіпсіздігімізді қамтамасыз ету, жұмыс орындары мен жалақыны сақтау үшін қажетті және мүмкін болатын  барлық шараларды  әрі қарай да қолдана береміз.

 Баршаңызға мықты денсаулық пен шыдамдылық тілеймін!

«Ойл Транспорт Корпорейшэн» ЖШС бас директоры 

2 августа 2022

Памятка

Вниманию сотрудников, посещающих спортивный комплекс!