ҚОШ КЕЛДІҢ, МЕРЕЙЛІ ӘЗ НАУРЫЗ! «ОЙЛ ТРАНСПОРТ КОРПОРЕЙШЭН» ЖШС ҰЛЫСТЫҢ ҰЛЫ КҮНІ – НАУРЫЗ МЕРЕКЕСІН 19 НАУРЫЗДА АТАП ӨТТІ

Қазақ даласына көктемдей нұрлы, күн дидарлы шуақты күндермен қатар келетін Наурыз мейрамы – ғасырдан-ғасырға жалғасып, ерекше реңкте тойланып келе жатқан түркі халықтарының төл мерекесі. «Наурыз – көктем мейрамы, табиғаттың жаңаруы, жаңа жылдың, жаңа өмірдің басталуы. Ұлыстың ұлы күні қазақ халқы үшін әрқашан қасиетті, киелі әрі орны бөлек мейрамдардың бірі болып саналады. Осындай қасиетті Наурыз мерекесін «Ойл Транспорт Корпорейшэн» ЖШС кең көлемде атап өтті. «Көктем мен жаңаруды айшықтайтын мерейі тасыған ұлы мереке Наурыз той» деп көркем үнмен киелі мерекені қарсы алған «Ойл Транспорт Корпорейшэн» ЖШС қызметкерлері Наурыз мейрамының Қазақстан халқы үшін рухани-мәдени тәрбиелік мәнін арттырып, маңызын дәріптеп, отбасылық мереке ретінде қалыптастыруды мақсат ете отырып ұйымдастырған.

Наурызды неғұрлым жомарттықпен атап өтсең, сол жылдың шарапаты да соғұрлым мол болады деген ұғымды алға тартып, мерейлі мерекеге арнайы киіз үй тігіліп, қазақтың ұлттық тағамдары дайындалып, Сенімгерлік басқарма ұжымдары қонаққа шақырылды.

Шара барысында «Ойл Транспорт Корпорейшэн» ЖШС бас директоры Серік Кеулімжаев жыйналған халыққа: «Жер дүниені жаңартып, ерте көктемде келетін Ұлыстың Ұлы күні-Наурыз мерекесі құтты болсын! Сізге және сіздің жанұяңызға шынайы көңілмен бақыт-береке, ашық аспан, игілік және алдағы жұмысыңызда толағай табыс тілеймін! Жылдан жылға еліміз өрлей берсін, көркейе берсін!»-деп игі тілегін айтты.

«Баршамызға Наурыз мерекесі құтты болсын! Ежелден жаңарту мен жасампаздықтың бастауы, ырыс пен берекенің арқауы болған Әз-Наурыз қажырлы еңбектеріңізге толағай табыстар әкелсін. Ел тыныш, туған жер аман болып, арайлап атқан әрбір таң шат көңіл, бақыт пен береке сыйласын!"-деп «Ойл Транспорт Корпорейшэн» ЖШС бас директорының өндіріс жөніндегі орынбасары Бердіғали Сүгіров жылы лебізін білдірді.

«Ойл Транспорт Корпорейшэн» ЖШС «Қызметкерлердің жергілікті кәсіподағының» ҚБ төрағасы Марат Темірқасов мырза елімізге тыныштық пен амандық, ұлыс оң болып, әрбір күніміз Наурыз күніндей шуақты болуын, Жаңа Жыл отбасымызға жақсылық, дастарханымызға құт-береке алып келуін тіледі.

Барлық жиналған халық дастарханда бас қосып, мерекелік думан әуелеген әнмен әрленіп, артынша сұлу да әрі кербез қыз-келіншектердің ұлттық киімдер сайысымен жалғасты. Қазақтың ұлттық киімдерін киген «ОТК» ЖШС сұлу да кербез қыз-келіншектері қазақтың әр жас аралығына қарай киетін ұлттық киім үлгілерін көрсетті. Әділ қазылардың шешімі бойынша бас жүлде иегері Серіктестіктің жетекші есепшісі – Үмітай Оспанова атанды.

Наурыз мерекесіне орай мұнай-газ өндірісі саласында атқарған көпжылдық адал еңбегі және көлік мекемесінің дамуына қомақты үлес қосып, жоғарғы көрсеткіштерге жеткені үшін «Ойл Транспорт Корпорейшэн» ЖШС бас директорының Құрмет грамотасымен Маңғыстау технологиялық көлік басқармасының одан әрі –МТКБ) №1 автотізбек жүргізушісі Д.Қадиров, №2 автотізбек жүргізушісі – Ә.Нетшеев, Маңғыстау технологиялық көлік басқармасының техникалық бақылау қызметінің аға шебері – Е.Малаев, «Ойл Транспорт Корпорейшэн» ЖШС персоналды басқару және еңбекақы төлеу бөлімінің 1 дәрежелі еңбек жөніндегі экономисі - А.Жидебаева, «Ойл Транспорт Корпорейшэн» ЖШС Әлеуметтік саясат және әкімшіліктендіру секторының әлеуметтік мәселелер жөніндегі жетекші маманы – Г.Кенджебаева марапатталды. 

Сонымен қатар, зейнетке шыққан М.Жазықбай және Т.Кусакаев қызметкерлерге осы мекемеде көп жылдық адал еңбегі және көлік мекемесінің дамуына қосқан мол үлесі мен жоғарғы көрсеткіштері үшін «Ойл Транспорт Корпорейшэн» ЖШС бас директоры Серік Кеулімжаев алғысын білдіріп, алғыс хаттарды табыстады.

Кейін жиналған дүйім жұрт алаңда ұйымдастырылған арқан тарту жарысын тамашалауға жиналды. «ОТК» ЖШС және МТКБ-ның білекті де, жүректі азаматтары арқан тарту және гір тасын көтеру сынды спорттық ойындарымен өзара бәсекеге түсті. Спорт  түрлерінен өткен  сайыстардың жеңімпаздары мен жүлдегерлері сыйлақтармен марапатталды.

Бұдан кейін еттен дәм татуға барлық жиналған қауым киіз үйге шақырылды. Жиналған көпшіліктің көңіл-күйі көтеріңкі болып, құттықтау тілектерін айтып, көктемгі той-думанға белсенді қатысып, мерекені шын жүректен және ұйымшылдықпен қарсы алды.

«Ойл Транспорт Корпорейшэн» ЖШС жыл басы – Наурыз мерекесімен баршаңызды құттықтайды. Әз Наурыз мемлекетімізге, әр отбасыға бақ пен береке, ырыс пен ынтымақ алып келсін. Еліміз аман, жұртымыз тыныш болсын.

29 тамыз 2019

«Ойл Транспорт Корпорейшэн» ЖШС бас директоры Серік Жеткергенұлы Кеулімжаев әріптестерін Қазақстан мұнайының 120 жылдығымен құттықтады

Құрметті әріптестер! Сіздерді Қазақстан мұнайына 120 жыл толуымен «Ойл Транспорт Корпорейшэн» ЖШС мен өзімнің атымнан шын жүректен құттықтаймын! Сіздердің еңбектеріңіз тәуелсіздік туын тұғырға қондырған еліміздің экономикалық және әлеуметтік жағынан дамуына, халқымыздың әл-ауқатын жақсарта түсу жолындағы толассыз еңбектеріңізге табыстар мен жарқын жеңістер тілейміз.